ਸੁਖਬੀਰ ਸਿੰਘ ਬਾਦਲ ਵਲੋਂ ਕੌਮਾਂਤਰੀ ਡਿਵੈਲਪਰਾਂ ਅੱਗੇ ਪ੍ਰਮੁੱਖ ਰੀਅਲ ਅਸਟੇਟ ਜਾਇਦਾਦਾਂ ਦੀ ਪੇਸ਼ਕਾਰੀ

--  ਬੇਸ਼ੁਮਾਰ ਮੌਕਿਆਂ ਦੀ ਧਰਤੀ ਪੰਜਾਬ ਵਿਚ ਨਿਵੇਸ਼ ਦਾ ਸੱਦਾ  

--  ਵੱਖ ਵੱਖ ਸ਼ਹਿਰਾਂ ਵਿਚ ਉਪਲੱਭਧ 10,000 ਏਕੜ ਪ੍ਰਮੁੱਖ ਵਪਾਰਕ ਮੰਤਵ ਵਾਲੀਆਂ ਜ਼ਮੀਨਾਂ ਦੇ ਰੱਖੇ ਵੇਰਵੇ   

--  ਪੰਜਾਬ ਦੀ ਰੀਅਲ ਅਸਟੇਟ ਨੀਤੀ 15 ਦਸੰਬਰ ਤੱਕ 

--  ਰੀਅਲ ਅਸਟੇਟ ਨੂੰ ਮਿਲੇਗਾ ਉਦਯੋਗ ਦਾ ਦਰਜਾ  

--  ਅਨੇਕਾਂ ਰਿਆਇਤਾਂ ਦਾ ਵਾਅਦਾ  

--  ਉਪਭੋਗਤਾ ਦੀ ਤਸੱਲੀ 'ਤੇ ਧਿਆਨ ਕੇਂਦਰਤ ਕਰਨ ਦੀ ਦਿੱਤੀ ਸਲਾਹ

ਨਵੀਂ ਦਿੱਲੀ, 17 ਨਵੰਬਰ: ਪੰਜਾਬ ਦੇ ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਨੇ ਅੱਜ ਇਥੇ ਕਨਫੈਡਰੇਸ਼ਨ ਆਫ ਰੀਅਲ ਅਸਟੇਟ ਡਵੈਲਪਰਜ਼ ਐਸੋਸੀਏਸ਼ਨ ਆਫ ਇੰਡੀਆ (ਸੀ.ਆਰ.ਈ.ਡੀ.ਏ.ਆਈ) ਵਲੋਂ ਪੰਜਾਬ-ਬੇਸ਼ੁਮਾਰ ਸੰਭਾਵਨਾਵਾਂ ਦੀ ਧਰਤੀ ਦੇ ਸਿਰਲੇਖ ਹੇਠ ਕਰਵਾਈ ਗਈ ਇੱਕ ਕਨਵੈਂਸ਼ਨ ਵਿਚ ਪੰਜਾਬ ਸਰਕਾਰ ਦੇ ਕਬਜ਼ੇ ਹੇਠਲੀ ਪ੍ਰਮੁੱਖ ਸ਼ਹਿਰੀ ਜ਼ਮੀਨ ਬਾਰੇ 137 ਕੌਮਾਂਤਰੀ ਅਤੇ ਕੌਮੀ ਰੀਅਲ ਅਸਟੇਟ ਡਵੈਲਪਰਾਂ ਅੱਗੇ ਵਿਸਥਾਰਤ ਪੇਸ਼ਕਾਰੀ ਦਿੱਤੀ। ਇਸ ਮੌਕੇ ਦੱਖਣੀ ਅਤੇ ਪੱਛਕੀ ਭਾਰਤ ਹੀ ਨਹੀਂ ਬਲਕਿ ਦੁਬਈ ਤੋਂ ਵੀ ਪਹੁੰਚੇ ਰੀਅਲ ਅਸਟੇਟ ਡਵੈਲਪਰਾਂ ਨੂੰ ਸੰਬੋਧਨ ਕਰਦਿਆਂ ਸ. ਬਾਦਲ ਨੇ ਉਨ੍ਹਾਂ ਨਾਲ ਆਪਣੇ ਪੰਜਾਬ ਨੂੰ ਦੇਸ਼ ਦੇ ਸੰਭਾਵੀ ਰੀਅਲ ਅਸਟੇਟ ਕੇਂਦਰ ਵਜੋਂ ਵਿਕਸਤ ਕਰਨ ਦੇ ਸੁਪਨੇ ਨੂੰ ਸਾਂਝਾ ਕਰਨ ਤੋਂ ਇਲਾਵਾ 15 ਦਸੰਬਰ ਤੱਕ ਰਾਜ ਦੀ ਵਿਆਪਕ ਰੀਅਲ ਅਸਟੇਟ ਨੀਤੀ ਜਾਰੀ ਕਰਨ ਦਾ ਵੀ ਵਾਅਦਾ ਕੀਤਾ।

ਪੰਜਾਬ ਨੂੰ ਬੇਸ਼ੁਮਾਰ ਸੰਭਾਵਨਾਵਾਂ ਦੀ ਧਰਤੀ ਵਜੋਂ ਪੇਸ਼ ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਪੰਜਾਬ ਨੇ ਬਿਨ੍ਹਾਂ ਆਪਣੀਆਂ ਕਰ ਦਰਾਂ ਵਿਚ ਵਾਧਾ ਕੀਤਿਆਂ 20 ਫੀਸਦੀ ਸਾਲਾਨਾ ਦੀ ਦਰ ਨਾਲ ਵੈਟ ਪ੍ਰਾਪਤੀਆਂ ਵਿਚ ਵਾਧੇ ਨਾਲ ਵਿਸ਼ਵ ਵਿਆਪੀ ਆਰਥਿਕ ਮੰਦਵਾੜੇ ਦੇ ਰੁਝਾਨ ਨੂੰ ਠਲ੍ਹ ਪਾਈ ਹੈ। ਉਨ੍ਹਾਂ ਕਿਹਾ ਕਿ ਰੀਅਲ ਅਸਟੇਟ ਡਵੈਲਪਰਾਂ, ਜਿਨ੍ਹਾਂ ਹੁਣ ਤੱਕ ਬਿਹਤਰੀਨ ਮੌਕਿਆਂ ਦਾ ਫਾਇਦਾ ਉਠਾਇਆ ਹੈ ਨੂੰ ਬਦਲੇ ਹੋਏ ਹਾਲਾਤ ਅੰਦਰ ਉਪਭੋਗਤਾ ਕੇਂਦਰਤ ਪਹੁੰਚ ਅਪਣਾਉਂਦਿਆਂ ਉਨ੍ਹਾਂ ਦੀਆਂ ਤੱਤਕਾਲੀ ਲੋੜਾਂ ਮੁਤਾਬਿਕ ਆਪਣੇ ਉਤਪਾਦਾਂ ਦਾ ਮੰਡੀਕਰਨ ਕਰਨਾ ਪਏਗਾ। ਸ. ਬਾਦਲ ਨੇ ਕਿਹਾ ਕਿ ਪੰਜਾਬ ਸਰਬ ਉਚ ਉਪਭੋਗਤਾ ਸੁਚਕ ਅੰਕ, ਸਰਬ ਉਚ ਪ੍ਰਤੀ ਵਿਅਕਤੀ ਆਮਦਨ, ਦੇਸ਼ ਦੇ ਬਿਹਤਰੀਨ ਬੁਨਿਆਦੀ ਢਾਂਚੇ, ਬਿਹਤਰੀਨ ਮਾਨਵੀ ਸ੍ਰੋਤਾਂ, ਸਨਅਤੀ ਅਤੇ ਖੇਤੀ ਕੰਮ ਕਾਜ ਅਤੇ ਸਭ ਤੋਂ ਵੱਧ ਪੰਜਾਬੀਆਂ ਦੀ ਖਤਰਾ ਮੁੱਲ ਲੈਣ ਦੀ ਇੱਛਾ ਸ਼ਕਤੀ ਨਾਲ ਨਿਵੇਸ਼ ਲਈ ਸਭ ਤੋਂ ਢੁੱਕਵਾਂ ਸਥਾਨ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇਸ਼ ਦਾ ਇਕਲੌਤਾ ਅਜਿਹਾ ਰਾਜ ਹੈ ਜਿਸ ਨੇ ਯੋਜਨਾਬੱਧ ਸ਼ਹਿਰੀ ਵਿਕਾਸ 'ਤੇ ਧਿਆਨ ਕੇਂਦਰਤ ਕਰਦਿਆਂ ਸਾਰੇ ਸ਼ਹਿਰਾਂ ਦੇ ਮਾਸਟਰ ਪਲਾਨ ਬਣਾਏ ਹਨ। ਉਨ੍ਹਾਂ ਕਿਹਾ ਕਿ ਇਹ ਦੇਸ਼ ਦਾ ਪਹਿਲਾ ਸੂਬਾ ਹੋਵੇਗਾ ਜੋ ਦਸੰਬਰ 2013 ਤੱਕ ਬਿਜਲੀ ਦੀ ਬਹੁਤਾਤ ਵਾਲਾ ਸੂਬਾ ਬਣ ਜਾਵੇਗਾ। ਇਸ ਤੋਂ ਇਲਾਵਾ ਤਿੰਨ ਕੌਮਾਂਤਰੀ ਹਵਾਈ ਅੱਡੇ, ਸਾਰੇ ਸ਼ਹਿਰਾਂ ਦੇ 4/6 ਮਾਰਗੀ ਸੜਕਾਂ ਨਾਲ ਸੰਪਰਕ ਅਤੇ ਸਿੱਖਿਆ, ਸਿਹਤ ਅਤੇ ਪ੍ਰਾਹੁਣਾਚਾਰੀ ਖੇਤਰਾਂ 'ਤੇ ਵਿਸ਼ੇਸ਼ ਧਿਆਨ ਹੋਣ ਨਾਲ ਇਸ ਦਾ ਭਵਿੱਖ ਬਹੁਤ ਰੌਸ਼ਨ ਹੈ। ਉਹਨਾਂ ਦੱਸਿਆ ਕਿ ਪੰਜਾਬ ਨੇ 32 ਸ਼ਹਿਰਾਂ, 72 ਸਥਾਨਕ ਯੋਜਨਾਬੰਦੀ ਖੇਤਰਾਂ ਅਤੇ 147 ਕਸਬਿਆਂ ਦੇ ਮਾਸਟਰ ਪਲਾਨ ਨੋਟੀਫਾਈ ਕਰ ਦਿੱਤੇ ਹਨ ਅਤੇ 27 ਮਾਸਟਰ ਪਲਾਨ ਤਿਆਰ ਹੋ ਰਹੇ ਹਨ। 

         ਰਾਜ ਦੇ ਬਿਜਲੀ ਦੀ ਬਹੁਤਾਤ ਵਾਲੇ ਰੁਤਬੇ ਦੇ ਵੇਰਵੇ ਦਿੰਦਿਆਂ ਸ. ਬਾਦਲ ਨੇ ਕਿਹਾ ਕਿ 8214 ਮੈਗਾਵਾਟ ਦੀ ਮੌਜੂਦਾ ਮੰਗ ਅਤੇ 5872 ਮੈਗਾਵਾਟ ਦੀ ਮੌਜੂਦਾ ਉਪਲੱਭਧਤਾ ਦੇ ਮੁਕਾਬਲੇ ਪੰਜਾਬ ਸੰਨ 2013 ਦੇ ਅੰਤ ਤੱਕ 11484 ਮੈਗਾਵਾਟ ਬਿਜਲੀ ਦਾ ਉਤਪਾਦਨ ਕਰੇਗਾ। ਉਨ੍ਹਾਂ ਕਿਹਾ ਕਿ 12,000 ਕਰੋੜ ਦੀ ਲਾਗਤ ਅਤੇ 1980 ਮੈਗਾਵਾਟ ਦੀ ਸਮਰੱਥਾ ਵਾਲੇ ਤਲਵੰਡੀ ਸਾਬੋ ਥਰਮਲ ਪਲਾਂਟ, 3000 ਕਰੋੜ ਰੁਪਏ ਦੀ ਲਾਗਤ ਵਾਲੇ ਅਤੇ 540 ਮੈਗਾਵਾਟ ਸਮਰੱਥਾ ਵਾਲੇ ਗੋਇੰਦਵਾਲ ਸਾਹਿਬ ਥਰਮਲ ਪਲਾਂਟ ਅਤੇ 9,000 ਕਰੋੜ ਰੁਪਏ ਦੀ ਲਾਗਤ ਅਤੇ 1400 ਮੈਗਾਵਾਟ ਦੀ ਸਮਰੱਥਾ ਵਾਲੇ ਰਾਜਪੁਰਾ ਥਰਮਲ ਪਲਾਂਟ ਤੋਂ ਬਿਜਲੀ ਦਾ ਉਤਪਾਦਨ ਅਗਲੇ ਸਾਲ ਤੋਂ ਸ਼ੁਰੂ ਹੋ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਸ ਤੋਂ ਇਲਾਵਾ 7600 ਕਰੋੜ ਰੁਪਏ ਦੇ ਨਿਵੇਸ਼ ਨਾਲ ਅਗਲੇ ਸਾਲ ਤੱਕ ਸ਼ੰਭੂ-ਜਲੰਧਰ, ਜਲੰਧਰ-ਪਠਾਨਕੋਟ, ਜਲੰਧਰ-ਅੰਮ੍ਰਿਤਸਰ, ਅੰਮ੍ਰਿਤਸਰ-ਪਠਾਨਕੋਟ, ਅੰਮ੍ਰਿਤਸਰ-ਜ਼ੀਰਾ-ਕੋਟਕਪੁਰਾ-ਸ਼੍ਰੀਗੰਗਾਨਗਰ, ਲੁਧਿਆਣਾ-ਮੋਗਾ-ਤਲਵੰਡੀ, ਹੁਸ਼ਿਆਰਪੁਰ-ਜਲੰਧਰ-ਮੋਗਾ-ਬਰਨਾਲਾ-ਸੰਗਰੂਰ-ਜੀਂਦ, ਖਰੜ-ਲੁਧਿਆਣਾ, ਕੁਰਾਲੀ-ਰੋਪੜ-ਕੀਰਤਪੁਰ ਸਾਹਿਬ, ਅੰਬਾਲਾ-ਜ਼ੀਰਕਪੁਰ-ਕਾਲਕਾ, ਜ਼ੀਰਕਪੁਰ-ਪਟਿਆਲਾ ਅਤੇ ਪਟਿਆਲਾ-ਬਠਿੰਡਾ 4/6 ਮਾਰਗੀ ਸੜਕਾਂ ਨਾਲ ਜੁੜ ਜਾਣਗੇ। 

ਯੋਜਨਾਬੱਧ ਸ਼ਹਿਰੀ ਵਿਕਾਸ ਦੀ ਗੱਲ ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਉਨ੍ਹਾਂ 147 ਸ਼ਹਿਰਾਂ ਦੇ ਸੰਗਠਿਤ ਵਿਕਾਸ ਲਈ 10,000 ਕਰੋੜ ਰੁਪਏ ਮੰਜੂਰ ਕੀਤੇ ਹਨ ਜਿਸ ਨਾਲ 24X7 ਬਿਜਲੀ ਸਪਲਾਈ, 100 ਫੀਸਦੀ ਪੀਣ ਵਾਲੇ ਪਾਣੀ ਅਤੇ ਸੀਵਰੇਜ ਦੀ ਵਿਵਸਥਾ, ਠੋਸ ਰਹਿੰਦ ਖੁਹੰਦ ਨਿਪਟਾਰੇ ਅਤੇ ਸੁਚੱਜੀ ਆਵਾਜਾਈ ਵਿਵਸਥਾ ਨੂੰ ਯਕੀਨੀ ਬਣਾਇਆ ਜਾਵੇਗਾ। ਰੀਅਲ ਅਸਟੇਟ ਡੈਵਲਪਰਾਂ ਨੂੰ ਪੰਜਾਬ ਵਿਚ ਨਿਵੇਸ਼ ਕਰਨ ਦਾ ਸੱਦਾ ਦਿੰਦਿਆਂ ਸ. ਬਾਦਲ ਨੇ ਕਿਹਾ ਕਿ ਰੀਅਲ ਅਸਟੇਟ, ਸੜਕੀ ਵਿਵਸਥਾ ਅਤੇ ਸ਼ਹਿਰੀ ਬੁਨਿਆਦੀ ਢਾਂਚਾ, ਮੋਹਾਲੀ, ਲੁਧਿਆਣਾ ਅਤੇ ਬਠਿੰਡਾ ਵਿਖੇ ਐਜੂ ਸਿਟੀਜ਼, ਅੰਮ੍ਰਿਤਸਰ ਅਤੇ ਲੁਧਿਆਣਾ ਵਿਖੇ ਸੈਰ ਸਪਾਟਾ ਅਤੇ ਮਨੋਰੰਜਨ ਕੇਂਦਰਾਂ ਤੋਂ ਇਲਾਵਾ ਸਿਹਤ, ਪ੍ਰਾਹੁਣਚਾਰੀ ਅਤੇ ਸੁਚਨਾ ਤਕਨਾਲੌਜੀ ਦੇ ਖੇਤਰਾਂ ਵਿਚ ਬੇਸ਼ੁਮਾਰ ਸੰਭਾਵਨਾਵਾਂ ਹਨ। ਉਨ੍ਹਾਂ ਰਾਜ ਸਰਕਾਰ ਵਲੋਂ ਹਰ ਸੰਭਵ ਸਹਿਯੋਗ ਦਾ ਭਰੋਸਾ ਦਿੱਤਾ। ਗਮਾਡਾ ਖੇਤਰ ਵਿਚ ਰੀਅਲ ਅਸਟੇਟ ਮੌਕਿਆਂ ਦੀ ਪੇਸ਼ਕਾਰੀ ਦਿੰਦਿਆਂ ਸ. ਬਾਦਲ ਨੇ ਦੱਸਿਆ ਕਿ ਚੰਡੀਗੜ੍ਹ ਦੇ ਨਾਲ ਸਿਟੀ ਸੈਂਟਰ (80 ਏਕੜ), ਮੈਡੀ ਸਿਟੀ (200 ਏਕੜ), ਆਈ.ਟੀ. ਸਿਟੀ (1600 ਏਕੜ) ਅਤੇ ਐਜੂ ਸਿਟੀਜ਼ (1700 ਏਕੜ) ਜੀਵਨ ਭਰ ਲਈ ਮੌਕੇ ਹਨ ਜੋ ਸਮੁੱਚੇ ਉਤਰੀ ਭਾਰਤ ਦੀ ਨੁਹਾਰ ਬਦਲ ਦੇਣਗੇ। ਉਨ੍ਹਾਂ ਦੱਸਿਆ ਕਿ ਟਾਟਾ ਕੈਂਸਰ ਅਤੇ ਖੋਜ ਹਸਪਤਾਲ ਪਹਿਲਾਂ ਹੀ ਮੁਲਾਂਪੁਰ ਵਿਚ ਸਥਾਪਿਤ ਹੋਣ ਜਾ ਰਿਹਾ ਹੈ ਅਤੇ ਐਜੂਕੇਸ਼ਨ ਸ਼ਹਿਰਾਂ ਅੰਦਰ ਯੂਨੀਵਰਸਿਟੀਆਂ, ਕਾਲਜਾਂ, ਮੈਨੇਜਮੈਂਟ, ਕੰਪਿਊਟਰ ਸਾਇੰਸ, ਇੰਜੀਨੀਅਰਿੰਗ ਅਤੇ ਬਾਇਓ ਤਕਨਾਲੋਜੀ ਸੰਸਥਾਵਾਂ ਲਈ 1700 ਏਕੜ ਜ਼ਮੀਨ ਦੀ ਪੇਸ਼ਕਸ਼ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਸੈਕਟਰ 62 ਸਥਿਤ ਸਿਟੀ ਸੈਂਟਰ ਵਿਖੇ ਪੰਜ ਤਾਰਾ ਹੋਟਲ, ਕਨਵੈਂਸ਼ਨ ਸੈਂਟਰ, ਸੌਪਿੰਗ ਮਾਲਜ਼, ਮਲਟੀ ਪਲੈਕਸਿਜ਼ ਅਤੇ ਆਡੀਟੋਰੀਅਮ ਦੇ ਸੰਗਠਤ ਵਿਕਾਸ ਦੀ ਪੇਸ਼ਕਸ਼ ਹੈ। ਗਮਾਡਾ ਨੂੰ ਦੱਖਣੀ ਪੂਰਬੀ ਏਸ਼ੀਆ ਦੇ ਸੂਚਨਾ ਤਕਨਾਲੋਜੀ ਧੁਰੇ ਵਜੋਂ ਵਿਕਸਤ ਕਰਨ ਦੇ ਆਪਣੇ ਨਿਸਚੈ ਨੂੰ ਦੁਹਰਾਉਂਦਿਆਂ ਸ. ਬਾਦਲ ਨੇ ਕਿਹਾ ਕਿ ਨਾਮੀ ਆਈ.ਟੀ. ਕੰਪਨੀਆਂ ਮੋਹਾਲੀ ਦੇ ਕੌਮਾਂਤਰੀ ਹਵਾਈ ਅੱਡੇ ਨੇੜੇ 1700 ਏਕੜ ਦੇ ਆਈ.ਟੀ. ਸਿਟੀ ਵਿਚ ਆਪਣੇ ਯੂਨਿਟ ਸਥਾਪਤ ਕਰਨ ਲਈ ਉਤਸੁਕ ਹਨ। ਉਹਨਾਂ ਲੁਧਿਆਣਾ ਵਿਖੇ ਏਅਰਪੋਰਟ ਨੇੜੇ 124 ਏਕੜ ਜ਼ਮੀਨ, ਲੁਧਿਆਣਾ ਨੇੜੇ 1500 ਏਕੜ ਦੀ ਇੰਟੈਗਰੇਟਿਡ ਟਾਊਨਸ਼ਿਪ ਅਤੇ 4500 ਏਕੜ ਦੇ ਮਨੋਰੰਜਨ ਕੇਂਦਰ ਸਮੇਤ ਉਪਲੱਭਧ ਰੀਅਲ ਅਸਟੇਟ ਦੇ ਮੌਕਿਆਂ ਦੀ ਜਾਣਕਾਰੀ ਵੀ ਡਵੈਲਪਰਾਂ ਅੱਗੇ ਰੱਖੀ। ਉਨ੍ਹਾਂ ਅੰਮ੍ਰਿਤਸਰ, ਜਲੰਧਰ ਅਤੇ ਪਟਿਆਲਾ ਵਿਖੇ ਵੀ ਪ੍ਰਮੱਖ ਰੀਅਲ ਅਸਟੇਟ ਮੌਕਿਆਂ ਦੇ ਪੇਸ਼ਕਸ਼ ਕੀਤੀ। 

15 ਦਸੰਬਰ ਤੱਕ ਪੰਜਾਬ ਦੀ ਰੀਅਲ ਅਸਟੇਟ ਨੀਤੀ ਜਾਰੀ ਕਰਨ ਦਾ ਐਲਾਨ ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਇਸ ਨੀਤੀ ਵਿਚ ਸਮਾਂਬੱਧ ਪ੍ਰਵਾਨਗੀਆਂ, ਸਾਰੇ ਸ਼ਹਿਰਾਂ ਲਈ ਇਕਸਾਰ ਸ਼ਰਤਾਂ, ਗੈਰ ਨਿਰਧਾਰਤ ਉਚਾਈ ਤੱਕ ਜਾਣ ਦੀ ਖੁੱਲ ਅਤੇ ਜਾਇਜ਼ ਸਰਕਾਰੀ ਫੀਸਾਂ ਜਿਹੀਆਂ ਵੱਡੀ ਰਿਆਇਤਾਂ ਦਿੱਤੀਆਂ ਜਾਣਗੀਆਂ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਨੂੰ ਆਪਣੀਆਂ ਰੀਅਲ ਅਸਟੇਟ ਸਕੀਮਾਂ ਲਈ ਹਮੇਸ਼ਾ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਉਨ੍ਹਾਂ ਦੱਸਿਆ ਕਿ ਐਰੋ ਸਿਟੀ ਵਿਚ 4000 ਜਾਇਦਾਦਾਂ ਲਈ 3.25 ਲੱਖ ਬਿਨੈ ਪੱਤਰ ਅਤੇ ਮੁਲਾਂਪੁਰ ਵਿਚ ਈਕੋ ਸਿਟੀ ਲਈ 807 ਜਾਇਦਾਦਾਂ ਲਈ 1.25 ਲੱਖ ਬਿਨੈ ਪੱਤਰ ਮਿਲੇ ਸਨ। ਇਸ ਤੋਂ ਪਹਿਲਾਂ ਨਿਵੇਸ਼ਕਾਂ ਨੂੰ ਸੰਬੋਧਨ ਕਰਦਿਆਂ ਸ਼੍ਰੀ ਐਨ.ਕੇ ਸ਼ਰਮਾ, ਮੁੱਖ ਸੰਸਦੀ ਸਕੱਤਰ ਉਦਯੋਗ ਨੇ ਪੰਜਾਬ ਸਰਕਾਰ ਦੀਆਂ ਵੱਖ ਵੱਖ ਨੀਤੀਆਂ ਦੇ ਅਹਿਮ ਪਹਿਲੂਆਂ ਬਾਰੇ ਜਾਣਕਾਰੀ ਦਿੱਤੀ। ਇਸ ਮੌਕੇ ਆਸਕਰ ਗਰੁੱਪ ਆਫ ਕੰਪਨੀਜ਼, ਮੁੰਬਈ, ਓਮੈਕਸ ਗਰੁੱਪ, ਸ਼ਿਪਰਾ ਗਰੁੱਪ, ਆਸ਼ੀਆਨਾ ਹੋਮਜ਼, ਐਸੋਟੇਕ ਲਿਮਟਿਡ, ਏ.ਟੀ.ਐਸ ਇਨਫਰਾਸਟਰਕਚਰ, ਏਜੀਜ਼ ਸੈਂਟਰ ਪੁਆਇੰਟ ਡਵੈਲਪਰਜ਼, ਸ਼ਿਵਾਲਿਕ ਗਰੁੱਪ, ਸੈਵੀ ਇਨਫਰਾਸਟਰਕਚਰ ਐਂਡ ਗਨੇਸ਼ ਹਾਉਸਿੰਗ ਕਾਰਪੋਰੇਸ਼ਨ ਅਹਿਮਦਾਬਾਦ, ਓਮੈਕਸ ਐਨ.ਸੀ.ਆਰ, ਬੀ.ਬੀ.ਸੀ ਇਨਫਰਾਸਟਰਕਚਰ, ਗਾਜੀਆਬਾਦ, ਮਹਿੰਦਰਾ ਐਸ.ਈ.ਜੈਡ ਐਂਡ ਲਾਇਫ ਸਪੇਸਿਜ਼, ਅਰਥ ਇਨਫਰਾਸਟਰਕਚਰ, ਜਨਪੱਥ ਅਸਟੇਟਸ, ਐਮਾਰ ਗਰੁੱਪ, ਅੰਸਲ ਲੋਟਸ, ਮਜੈਸਟਿਕ, ਏਰੀਅਨ ਆਰ ਗਰੁੱਪ, ਇਨੋਵੇਟਿਵ ਗਰੁੱਪ, ਐਂਬਿਅੰਸ ਗਰੁੱਪ, ਅਰੀਹੰਤ ਬਿਲਡਰਜ਼, ਗੋਲਡ ਕੋਸਟ, ਫੌਰਚੂਨ ਮਲਟੀਟੈਕ, ਟੀ.ਡੀ.ਆਈ ਇਨਫਰਾਸਟਰਕਚਰ, ਇਰੋਜ਼ ਗਰੁੱਪ, ਪੈਰਾਮਾਉਂਟ ਗਰੁੱਪ ਐਂਡ ਅਲੀਵਾਦੀ ਐਂਡ ਕੰਪਨੀ, ਪਾਰਸ਼ਵਨਾਥ ਗਰੁੱਪ ਅਤੇ ਕੁਮਾਰ ਅਰਬਨ ਡਵੈਲਪਮੈਂਟ, ਪੁਣੇ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਹਾਜ਼ਰ ਸਨ। ਉਨ੍ਹਾਂ ਸ. ਬਾਦਲ ਦੀਆਂ ਪਹਿਲਕਦਮੀਆਂ ਲਈ ਪੂਰਨ ਹਮਾਇਤ ਦੀ ਪੇਸ਼ਕਸ਼ ਕਰਦਿਆਂ ਕਿਹਾ ਕਿ ਉਹ ਪੰਜਾਬ ਦੇ ਵੱਖ ਵੱਖ ਖੇਤਰਾਂ ਵਿਚ ਨਿਵੇਸ਼ ਲਈ ਰਾਜ ਸਰਕਾਰ ਦੇ ਅਧਿਕਾਰੀਆਂ ਨਾਲ ਅੱਜ ਤੋਂ ਹੀ ਤਾਲਮੇਲ ਕਰਨਗੇ। ਇਸ ਤੋਂ ਪਹਿਲਾਂ ਸੀ.ਆਰ.ਈ.ਡੀ.ਏ.ਆਈ ਦੇ ਪ੍ਰਧਾਨ ਸ਼੍ਰੀ ਲਲਿਤ ਕੁਮਾਰ ਜੈਨ ਨੇ ਸ. ਬਾਦਲ ਦੇ ਨਿਵੇਕਲੇ ਉਦਮਾਂ ਦੀ ਸ਼ਲਾਘਾ ਕੀਤੀ ਅਤੇ ਸ਼੍ਰੀ ਪਰਦੀਪ ਜੈਨ ਨੇ ਸਭਨਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸ਼੍ਰੀ ਐਸ.ਕੇ ਸੰਧੂ, ਪ੍ਰਮੁੱਖ ਸਕੱਤਰ ਮਕਾਨ ਉਸਾਰੀ ਅਤੇ ਸ਼ਹਿਰੀ ਵਿਕਾਸ, ਸ਼੍ਰੀ ਪੀ.ਐਸ. ਔਜਲਾ, ਪ੍ਰਮੁੱਖ ਸਕੱਤਰ ਲੋਕ ਨਿਰਮਾਣ, ਸ਼੍ਰੀ ਮਨਵੇਸ਼ ਸਿੰਘ ਸਿੱਧੂ, ਮੁੱਖ ਪ੍ਰਸ਼ਾਸ਼ਕ ਪੁੱਡਾ ਅਤੇ ਵੱਖ ਵੱਖ ਵਿਕਾਸ ਏਜੰਸੀਆਂ ਦੇ ਮੁੱਖ ਪ੍ਰਸ਼ਾਸ਼ਕ ਵਿਸ਼ੇਸ਼ ਤੌਰ 'ਤੇ ਹਾਜਰ ਸਨ।